team

Il proget e’l üert da Cruschada ha cumanzà d’inviern 2015 tanter trais sours:

Cilgia Marti (30) – giardiniera e paura da professiun

Ella cultiva e chüra vos üertin e prodots.

Ella es nada a Sent ed ha quia eir frequentà ils ons da scoula elementara. Fingià da mattina d’eir’la fich interessada pellas lavuros in üert e sülla pauraria da seis genituors ingio ch’ella ha lura eir svessa svelt tut per mans la lavur.

Cun 16 ons es Cilgia partida davent da l’Engiadina. Il giarsunadi da giardiniera chi ha dürà trais ons ha’la fat illa giardinaria “Urech” a Cuoira e fini quel cul diplom dal 2006.

Sco giardiniera ha’la lura lavurà ils prossems ons in diversas giardinarias in Grischun ed ella ha eir passantà ün pêr stats sün alp.

L’on 2009 ha cumanzà per Cilgia il seguond giarsunadi sco paura. Quist giarsunadi ha’la frequentà sülla pauraria da clinica psichiatrica “Waldhaus” a Cuoira. Sün quista pauraria ha’la gnü da cultivar eir ün grond üert. Il diplom sco paura biologica ha’la survgni dal 2011 da la scoula paurila grischuna”Plantahof”.

Daspö ses ons es Cilgia darcheu tuornada in Engiadina. Quia è’la ingaschada sco giardiniera, paura e mamma.

Anna e Tinetta, (29 e 33) – geologa ed architecta

Ellas sun duos (da las trais) sours da Cilgia e surpiglian l’affar da l’administraziun ed organisaziun dal proget. Cun problems da quints esa da plondscher pro ellas. Michatant (cun bell’ora) güdna lura eir in üert!