La Cruschada nun es oter sco ün simpel üertet a Crusch lià culla pauraria da la famiglia Marti chi spordscha verdüra biologica, erbinas, frütta ed eir fluors a la glieud da la regiun.
Il üert vain cultivà da la giardiniera e paura Cilgia Marti chi fa seis üert cun paschiun, pazienzcha ed eir creatività. Ella ha jent la relaziun directa e persunala cun sias cliaintas e seis cliaints e metta ün “touch Cilgia” in mincha prodot – ün bun exaimpel sun seis püschels fluors.
Il üert da la Cruschada as rechatta sur la pauraria Marti a Crusch (sül stradun tanter Scuol e Ramosch) ingio chi’s riva eir fich simpel cul auto da posta. Eir üna spassegiada da Sent, Sur-En o Scuol fin pro la Cruschada vala la paina.
